მოკლე ინფორმაცია ნაკრესის შესახებ
თავდაპირველად, ჩვენი ორგანიზაცია ენთუზიასტი ბუნებისდამცველების მიერ არაფორმალურად დაარსდა 1989 წელს. ხოლო 1991 წელს დარეგისტრირდა როგორც არასამთავრობო ორგანიზაცია სახელწოდებით - გადაშენების პირას მყოფი სახეობების აღდგენის ცენტრი „ნოეს კიდობანი“ (აკრონიმი „ნაკრესი“ წარმოადგენს ამ სახელწოდების ინგლისური ვერსიის აბრევიატურას: Noah’s Ark Centre for the Recovery of Endangered Species – NACRES). მოგვიანებით, კანონის მოთხოვნის შესაბაბამისად, ცენტრი ხელახლა დარეგისტრირდა და სახელიც გადაერქვა, როგორც „სახეობათა კონსერვაციის სამეცნიერო-კვლევითი ცენტრი, თუმცა ქართულ სახელწოდებაშიც შეინარჩუნა პირვანდელი აკრონიმი „ნაკრესი“. ამდენად, „ნაკრესი“ არის რეგისტრირებული არასამეწარმეო (არაკომერციული) იურიდიული პირი.
ცენტრის მისიაა ქვეყნის ბიომრავალფეროვნების დაცვის, შენარჩუნებისა და აღდგენის ხელშეწყობა; მისი საქმიანობა ეფუძნება სამეცნიერო კვლევებს და ხორციელდება საქართველოს რეგიონებში ბუნებრივი რესურსების მდგრადი გამოყენების წახალისების, მოსახლეობის ცნობიერების ამაღლებისა და ბუნების დაცვით საქმიანობაში მათი ინტენსიური ჩართვის საშუალებით.
ჩვენი მთავარი ამოცანებია:
- საქართველოს გადაშენების საფრთხის წინაშე მყოფი სახეობებისა და ჰაბიტატების აღდგენა და კონსერვაცია;
- ბუნებრივი ეკოსისტემების კონსერვაცია დაცული ტერიტორიებისა და სხვა ქსელების ეფექტურობის ამაღლების ხელშეწყობა;
- ადამიანის ზემოქმედების, გაუდაბნოებით ან კლიმატის ცვლილებით დეგრადირებული ეკოსისტემების ეფექტური მართვის წახალისება;
- ადამიანსა და ველურ ბუნებას შორის კონფლიქტის შემსუბუქება, სათანადო კვლევების, შედეგზე ორიენტირებული ქმედებების, ეფექტური შემარბილებელი ინსტრუმენტებისა და მექანიზმების დანერგვის საშუალებით;
- ფართო საზოგადოებასა და ბიოლოგიური რესურსების მომხმარებლებზე ორიენტირებული ცნობიერების ამაღლებისა და გარემოსდაცვითი საგანმანათლებლო საქმიანობების განხორციელება;
- სტრატეგიული გარემოსდაცვითი დოკუმენტებისა და შესაბამისი კანონმდებლობის შემუშავებაში მონაწილეობა.
ჩვენი საქმიანობის ძირითადი კომპონენტებია:
- სახეობების, პოპულაციებისა და ეკოსისტემების შესწავლა და მათი საკონსერვაციო სტატუსისა და საფრთხეების შეფასება;
- ბუნების დაცვის მიმართულებით ადგილობრივი და ცენტრალური სამთავრობო, ასევე აკადემიური სექტორის, ადგილობრივი სამოქალაქო საზოგადოებისა თუ არასამთავრობო ორგანიზაციების გაძლიერების ხელშეწყობა;
- ადგილობრივი საზოგადოებრივი და საინიციატივო ჯგუფების მობილიზება და მათი ჩართვა საკონსერვაციო საქმიანობებში;
- დაცული ტერიტორიებისა და ზურმუხტის ქსელის ეფექტურობის გაზრდაზე ორიენტირებული ქმედებები;
- გადაწყვეტილების მიმღებთა, ადგილობრივ რესურსების მომხმარებელთა და ფართო საზოგადოების ცნობიერების ამაღლება კონსერვაციის შესახებ;
- ადგილობრივი მოსახლეობის ყოფის გაუმჯობესება, განსაკუთრებით დაცული ტერიტორიების გარშემო, მათ შორის ბუნებაზე დაფუძნებული მდგრადი ტურიზმის საშუალებით;
- ბიოლოგიური რესურსების კონსერვაციისა და მდგრადი გამოყენების ეროვნული პოლიტიკისა და კანონმდებლობის შემუშავებაში მონაწილეობა.
